Պետրոս Թովմասի Թաշճյան. ծննդյան 155-ամյակը

Բժիշկ, կուսակցական, ազգային գործիչ: Ծնվել է 1867 թ. նոյեմբերի 21-ին, Արևմտյան Հայաստանի Դիարբեքիր (Տիգրանակերտ) քաղաքում:

Հայրը`Ամիրա Թովմաս Թաշճյանը երկար տարիներ վարել է պարսից հյուպատոսի պաշտոնը:

Ավարտել է Խարբերդի Ամերիկյան քոլեջը:

1895 թ. ավարտել է Ամերիկայի Բալթիմորի բժշկական հալսարանը և վերադարձել հայրենիք:

1895 թ. Օսմանյան կայսրությունում Համիդյան հայաջարդերի պատճառով, հոր օգնությամբ ու ջանքերով տեղափոխվել է Պարսկաստան:

Տարված լինելով ժամանակի հայկական ազատագրական գաղափարներով, անմասն չի մնացել այդ շարժման ընդհանուր հանգանակությանը:
 
Ազգային, կուսակցական (ՀՅԴ) գործերով եղել է Սալմաստում, Թավրիզում, Ռաշտում, որտեղ և ամուսնացել է:

Ցարական կարգերի օրոք իր խոշոր ծառայությունն է մատուցել արտասահմանից արգելված հեղափոխական գրականություն Կովկաս անցկացնելու գործում:

Մտերիմ է եղել հայ ազգային-ազատագրական շարժման և ռազմական գործիչ, ֆիդայի, ՀՅԴ անդամ Եփրեմ Խանի (Եփրեմ Դավթյան) և զորավար Անդրանիկ Օզանյանի հետ:

1915 թ. կամավորական խմբերի հետ, որպես կամավոր բժիշկ, մեկնել է Վան, ապա Կովկաս:

1916-20 թթ. Հայաստանում զբաղվել է հազարավար հայ գաղթականներին բժշկական օգնություն ցուցաբերելու աշխատանքներով:
Հայաստանի Հանրապետության անկումից առաջ վերադարձել է Ռաշտ և ավելի քան 50 տարի աշխատել բժիշկ:

Եղել է Գիլանի գավառի հայ, պարսիկ, թուրք, գիլաք բնակչության կողմից սիրված բժիշկ ու հարգված անձնավորություն:
 
Նրան ճանաչում ու վստահում էին գավառի բոլոր քաղաքներում ու գյուղերում:

Ակտիվորեն զբաղվել է ազգային, հասարակական ու կուսակցական գործունեությամբ:

Մահացել է 1946 թ. հուլիսի 8-ին, Ռաշտում:

Թոռը` Պետրոս Թաշճյանը, Անգլիայում կրթություն ստանալուց հետո, որպես նավաստի երկար տարիներ աշխատել է անգլիական առևտրային նավատորմում, 2014 թ. դրությամբ բնակվում է Ռաշտում:

Հարություն Մինասյան
«Հայազգի բժիշկ-գործիչներ» գրքից համառոտագրված տարբերակ

Հարցեր, պատասխաններ, մեկնաբանություններ